Конечен крај на гревот и грешниците

Додека силите на злото размислуваат за сè што се случило, почнува процес кој на крај ќе ги наведе да сфатат дека згрешиле и погрешно му го припишале на Бога своето сопствено зло. Но, на крајот од милениумот, кога Бог повторно ќе ги врати безбожниците во живот (ќе ги воскресне во второто воскресение – Откровение 20,5), тие сè уште не се подготвени тоа јавно да го признаат.

Во очаен обид повторно да задобијат контрола над земјата како средиште на својата власт, сатаната и грешниците организираат напад на Божјиот град кој слегол од небото (Откровение 20,7-9; 21,2). Додека јуришаат во воен поход кон градот, се соочуваат со своето сопствено минато. Пред нив се отвораат небесните книги и тие, како на филмско платно се гледаат себеси, го гледаат својот живот и улогата што ја одиграле во космичкиот судир (Откровение 20,11-13). Немоќни да се одбранат од обвинувањата и доказите, сфаќаат дека единствено што можат да сторат е да признаат дека се виновни, односно, да го прифатат обвинението. Во тој миг тие ќе ги превиткаат своите колена и ќе признаат дека Христос е праведен Господ и дека праведно постапува со нив. Сега космичкиот судир ќе може да се оконча. Божјиот карактер е одбранет дури и во нивните очи, во очите на неговите непријатели. Тогаш сатаната, неговите демони и нивните истомисленици, грешниците, можат да бидат отстранети од вселената. Космичкиот судир е разрешен и во нивниот ум додека заминуваат во вечна смрт, наполно убедени дека Бог навистина е љубов и дека самите се виновни за својата вечна пропаст, за своето заминување во вечно непостоење.

Пристигнавме до мигот кога ѓаволот (сатаната) организира последен напад против небесниот град Ерусалим, кој се спуштил од небото на земјата, за да ги уништи Христа и спасените во него и истиот да го стави под своја власт. Тој, како главен војсководител, застанува на чело на тоа огромно мноштво воинствени грешници, кои воскреснале во второто воскресение, многубројни како „морскиот песок“.

Апостол Јован го посматрал тој организиран напад на градот и при тоа видел како „падна оган од небото и ги проголта. И ѓаволот, кој ги заблудуваше, беше фрлен во езерото од оган и сулфур, каде што се ѕверот и лажниот пророк… и морето ги предаде мртвите кои беа во него; и смртта и гробот (пеколот, адот) ги предадоа мртвите кои беа во нив, и секој беше суден според своите дела. И смртта и гробот беа фрлени во огненото езеро. Тоа е втората смрт, огненото езеро. И кој не беше запишан во Книгата на животот, беше фрлен во огненото езеро“ (Откровение 20,20,9.10; 13-15).

Кратко резиме на овие текстови! Од небото, од Бога, паѓа небесен оган кој ја запалува целата планета Земја и ја претвора во огнено езеро, во огромно огнено море со огнени бранови – во оган кој ќе спали и ќе уништи сè што создала човечка рака, сè што е грешно и заразено со грев. Во езерото се фрлени сите непокајани грешници кои воскреснале не во првото, туку во второто воскресение. Заедно со грешниците, во езерото е фрлен и сатаната, ѓаволот, а со нив, „во огненото езеро се фрлени и смртта и гробот.“ Смртта како смрт и гробот како гроб, и измислениот од луѓето и толку долго и упорно поддржуван и бранет пекол, подземје, ад – се фрлени во огненото езеро. И сите нив – и грешниците, и ѓаволот, и смртта како смрт, и гробот како гроб, кажува Божјата реч, „падна оган од небото и ги проголта“, ги уништи и ги исчисти за сета вечност, ги прати во неврат и заборав. Не постои никакво вечно мачење, туку ќе изгорат засекогаш. „Господ ќе ја уништи смртта засекогаш, и ќе ја избрише солзата од секое лице.“ „Последниот непријател кој ќе биде уништен е смртта“ (Исаија 25,8; 1. Коринќаните 15,26).

Кога небесниот суд конечно ќе расчисти со гревот и  грешниците, Христос со полно право и власт, сиот грев – и старозаветниот, исфрлен во пустина, и новозаветниот баласт во небесното Светилиште – значи, севкупниот грев – ќе го струполи врз главата на оној во чиешто срце се зачнал, врз главата на ѓаволот, кој треба да одговара и да добие заслужена казна за него во огненото езеро.

Конечно, тој смрдлив вселенски смет, кој ја гнаси и загадува вселената и ја нарушува нејзината убавина, хармонија и среќа, мора да се отстрани од неа, да се спали и еднаш за секогаш да исчезне не само надворешно, туку и од мислите на сите небесни суштества – и споменот на него да се заборави.

„А на страшливците, на неверните, на гнасните, на убијците, на блудниците, на гатачите, на идолопоклониците и на сите лажливци, делот им е во езерото што гори со оган и сулфур; тоа е втора смрт.“ „Земјата ќе изгори со сите нејзини дела… запалените небеса ќе се распаднат, состојките ќе се стопат со огромна жештина“ (Откровени 21,8; 2. Петрово 3,10.12).

Ете, така завршува повеќемилениумската одисеја на „големата ламја, на старата змија, која се вика ѓавол и сатана“ и нејзиниот смртоносен изум, наречен „грев“ (Откровение 12,9). Така завршуваат и мрачните сили, демоните, кои со своите бандитски грешни авантури долго ја треселе и разорувале земјата, исполнувајќи ја со лелеци и пискоти што се разнесувале низ целата Божја вселена, предизвикувајќи кај нејзините жители огромна жалост, и гламносувале милијарди срца на милијарди луѓе, забрадувајќи ги во најцрна црнина. Така завршуваат и грешниците чиишто имиња не се запишани во Книгата на животот – во огнено езеро, во оган кој ќе ги спали и изгори еднаш засекогаш – и сатаната, и земјата, и грешниците со нивните гревови.

Почитувани, така кажува Божјата реч, така кажува Господ за крајот на гревот и грешниците, за крајот на сатаната, за крајот на смртта и гробот.

Откако огнот ќе го уништи сатаната и ќе ја исчисти земјата од гревот и грешниците, Бог ќе ја обнови или ќе ја пресоздаде нашата планета, повторно ќе ја претвори во рај, во нова земја на која спасените ќе најдат своја вечна татковина.

Кога ќе заврши и оваа, трета фаза од небесниот суд и трета фаза од планот на спасението, нашиот Спасител, Исус Христос, по третпат ќе ги изговори истите славни зборови што ги изговорил на крстот, кога ја завршил првата фаза од планот на спасението: „Се сврши!“ (Откровение 21,6).

Во продолжение следат поднасловите од поглавјето „Второто Христово доаѓање“. Кога ќе кликнете врз поднасловите, ќе ви се отворат нивните текстови.