Новата епоха (New Age)

Поимот е земен од астрологијата, па затоа и самата замисла и темелот на Њу ејџ (New Age– во светот е прифатено ова име) целосно се астролошки. Веднаш да кажеме дека тоа не е единствена институција, ниту единствена организација, туку широка мрежа на различни ограноци, групи и правци составено од луѓе кои доаѓаат од разалични средини, но имаат ист начин на размислување (феминизам, екологија, окултизам, психологија, хиндуизам, будизам, мистично христијанство и многу други правци), иста желба за духовен напредок. Може да се каже дека тоа е сеопшто движење на цел свет за духовно издигнување, за духовен подем.

Според учењето на Њу ејџ, сега, за што веќе кажавме нешто во претходниот наслов, влегуваме во „нова, седма астролошка епоха, наречена „Аквариус“ или „Водолеец“ – која ќе трае следните 2.000 години. Новиот период од 2.000 години ќе биде обележан со духовна просветеност, со братство, со мир и хармонија… Се смета дека седмата астролошка епоха го опфаќа зенитот од развојот на човештвото. Поради тоа, таа е исклучителна, посебна. На нејзиниот почеток ќе се појави нов „христос“ кој ќе го обележи почетокот на новата епоха и кој ќе го обедини цел свет во една светска религија. Целта на системот на Њу ејџ е да го приготви светот за појавување на новиот христос и за воспоставување на еден нов светски духовен систем, за новата светска религија1, која треба да настане со комплетно обединување на човештвото со помош на сите можни „духовни“ средства.

Во нацртот за светската религија на Њу ејџ постои план за обединување на сите вери на светот во една нова заедничка,  универзална светска религија во која ќе веруваат сите заедно. Според таа идеја, човештвото духовно ќе се издигне на ниво на сеопшта љубов, хармонија и мир и на тој начин ќе се отстранат и ќе се решат сите проблеми на човештвото. Секако, оние што не ќе го прифатат тоа, ќе мора да бидат присилени или елиминирани. Значи, на повидок е најголема инквизиција во историјата на човештвото.

Наводно тој замислен, утопистички прогрес на човештвото, ќе се постигне со медитација и со реинкарнација, која подразбира духовен напредок, продуховување на луѓето, подигање на духовната свест на повисок степен.

Она што вчудовидува кај Њу ејџ: тој планира потполно соединување на овој видлив со невидливиот свет. Тоа е универзален систем со кој појавите на духовите ќе бидат секојдневна реалност. Во зенитот на големиот план треба да се појави сам Исус Христос на земјата.

Окултизам и сатанизам. Бидејќи се надминати поделбите меѓу доброто и злото, Њу ејџ е отворен кон сите окултни правци. И самиот проникнат со спиритуален карактер (призивање на духовите на древните мудреци и гуруи), тој се здружува со сите спиритистички правци, па и со сатанизмот. Всушност, Њу ејџ е збир на сите окултни правци кои се стремат кон една нова епоха во која ќе завладеат „духовните сили“, односно духовите на „Новата епоха“. Окултните пракси не се критикуваат, туку се добредојдени како стара „универзална мудрост“. Така тој ги обединува сите окултни редови во еден единствен фронт. Целта на Њу ејџ е да ја отстрани границата меѓу видливиот или материјалистичкиот и невидливиот или духовниот свет.

Бидејќи според Њу ејџ сатаната не е опасен, туку „добротвор на човештвото“, „просветител – Луцифер“, тој треба да се открие и на човештвото да му покаже подобар пат. Според тоа, зад ова движење (Њу ејџ), кое го освојува светот и станува доминантно на светската сцена, стои директно сатаната, кој е негов иницијатор, инспиратор и татко. Всушност, тоа е негово дело и може да се замисли што му се приготвува на сегашното човештво, на чиешто чело треба да застане најголемиот измамник, тиран и убиец. За тоа кој е сатаната, всушност веќе доста е кажано во оваа книга.

Во продолжение следат поднасловите од поглавјето „Спиритистичкиот скелет на новата светска религија „Нова Епоха“ (New Аge)“. Кога ќе кликнете врз поднасловите, ќе ви се отворат нивните текстови.