Апостолите се собрале таа недела на богослужение – и ете доказ дека саботата е заменета со недела!?

„А вечерта, на истиот прв ден од седмицата, додека вратата каде што беа собрани учениците беше затворена поради страв од Евреите, Исус дојде, застана насреде и им рече: ‘Мир вам!’“ (Јован 20,19). – Ете „силен“ библиски доказ за неделата, гласно извикнуваат нејзините застапници и бранители. Во неделата, продолжуваат понатаму, кога Христос воскреснал, апостолите се собрале на свето богослужение да празнуваат недела и да го прославуваат Христовото воскресение. Христос им се јавил на учениците, а пред тоа и на жените, во неделата, кога воскреснал. Неколкупати во текот на тој ден Исус имал средба со своите следбеници, па според тоа, треба ли поголем доказ од овој дека Христос со своето воскресение неделата ја посветил како ден за одмор наместо старата „еврејска“ сабота, прашуваат нашите браќа христијани кои празнуваат недела.

Ве молам, почекајте малку! Не бидете премногу самоуверени. Стихот кажува дека учениците се собрале на куп во неделата и се заклучиле „поради страв од Евреите“, а не заради тоа да празнуваат недела. Уште помалку се собрале во неделата за да го празнуваат Христовото воскресение и во спомен на воскресението да ја воведат неделата како ден за одмор наместо саботата. Тоа што Исус им се јавил на Марија Магдалена и на другите жени во неделата изутрина кога воскреснал било потребно за да се види и да се потврди дека Тој воскреснал, да се објави неговото воскресение како гаранција за нашето воскресение, а не да се истакне неделата како ден за одмор.

Значи, овие „златни алки“ во синџирот на христијанските аргументи за неделата како празник се ’рѓосани, гнили и испокинати. Зошто? Затоа што учениците воопшто не знаеле, не очекувале ниту пак верувале дека Христос ќе воскресне. Па како можеле тогаш да ја празнуваат неделата? Ним никој не им кажал дека треба да празнуваат недела. Во петокот, откако го закопале Христа, „во саботата почиваа според законот“ – значи, и во саботата се собрале, како и во неделата, но во саботата Христос не им се јавил затоа што Тој не воскреснал во саботата (Лука 23,56). Според тоа, сè додека Христос не умрел, па и кога умрел, учениците знаеле само за саботата како ден за одмор. Ниту по Христовата смрт во петокот во нивниот ум воопшто не била зачната никаква мисла и идеја за замена на саботата со недела.

„А тие (учениците), кога чуја дека е жив и дека таа (Марија) го видела, не поверуваа. Потоа им се јави во друг лик, на двајца од нив, по патот, кога одеа надвор од градот. И тие отидоа и им јавија на другите, но и ним не им поверуваа. Најпосле им се јави и на единаесеттемина, додека седеа крај трпезата, и ги прекори заради нивното неверие и закоравеноста на срцата, бидејќи не им поверуваа на оние што го видоа воскреснат… Марија од Магдала, Јоана и Марија, мајката на Јакова, и други жени со нив, им го кажаа тоа (дека Христос воскреснал) на апостолите. А ним овие зборови им се чинеа невистина (други преводи: им изгледаа како празна шега, како лага) и не сакаа да им поверуваат“ (Марко 16,11-14; Лука 24,10.11). – И во овие текстови четири пати се кажува дека апостолите не поверувале оти Христос воскреснал, дека тие вести за неговото воскресение се „празна шега“ или „лага“, па апсурд е да се тврди дека тие во неделата се собрале да го слават воскресението и со тоа да празнуваат недела.

Во повеќе наврати Христос на учениците им зборувал за своите страдања, за својата смрт и за своето воскресение, но никаде, буквално никаде во Библијата нема никаква трага, никакво навестување за некаква светост на неделата како спомен на неговото воскресение, можност за замена на саботата со недела.

Осум дена подоцна Исус пак им се јавува на собраните ученици, овојпат заради Тома, кој не бил присутен при првата средба на учениците со својот воскреснат Господ (Јован 20,26). Не е кажано кој е тој ден. Ако е понеделник, тогаш учениците, освен во недела, се собирале и во другите денови на седмицата, што не е спорно. Ако, пак, тој ден бил недела, тогаш на неделата како недела во Библијата не ѝ се дава посебно значење, зашто таа овде не се именува дури ни со нејзиното вистинско име, како „прв ден“, ами како некојси осми ден.

Дека на неделата не ѝ се дава посебно значење се гледа и од други примери. Сам Христос неделата во која ќе воскресне не ја именува како „прв ден“, ами како „трет ден“: „Почна да ги учи дека Синот човечки треба многу да пострада, да биде отфрлен од старешините, првосвештениците и книжниците, и да биде убиен и на третиот ден да воскресне“ (Марко 8,31).

Ако постоеше идеја кај Христа со своето воскресение да ја менува саботата со недела, во оваа пригода Тој веројатно ќе ја најавеше таа можност, ќе дадеше некаков сигнал, и наместо да каже „да воскресне на третиот ден“, или „по три дни“, на денот на воскресението, односно на неделата како недела ќе ѝ дадеше некакви препознатливи атрибути што би ја издигнале над саботата и над другите денови. Но од тоа нема ни трага затоа што за Христа важно беше да го истакне воскресението како воскресение, а не денот на воскресението.

Уште појасно и непорекливо е Исусовото сведоштво што им го даде на апостолите по своето воскресение, непосредно пред да се вознесе, кога им рече: „Напишано е дека Христос треба да настрада и да воскресне од мртвите на третиот ден“ (Лука 24,46).

Замислете, и по своето воскресение, кога конечно требаше неделата да ја прогласи за празник, за „славен ден на воскресението“ и за „Господов ден“, Христос не го стори тоа. За него неделата и по неговото воскресение остана само како „трет ден“ и ништо повеќе.

На ист начин, како и неговиот Учител, Христос, размислува и апостол Павле кога вели: „Христос умре за нашите гревови, според Писмата, беше погребан и воскресна на третиот ден, според Писмата“ (1. Коринќаните 15,3.4). Значи, и апостол Павле, триесетина години подоцна, го возвишува воскресението, а на денот на воскресението не му придава никаква важност. Уште повеќе, тој ден не го нарекува со неговото вистинско име како „прв ден“, туку го именува со „трет ден, според Писмата“. Според тоа, и за апостол Павле неделата не е „света недела“, туку обичен „трет ден“.

Во продолжение следат поднасловите од поглавјето „Саботата не е заменета со недела“. Кога ќе кликнете врз поднасловите, ќе ви се отворат нивните текстови.