Лажните христоси ќе помогнат неделниот закон да се прифати во цел свет

Како што видовме, пророштвото кажува оти со неделниот закон, што ќе го скрои и ќе го спроведува протестантска Америка, таа ќе го принуди цел свет да ја прифати неделата како ден за одмор. Од друга страна, неделниот закон за католиците, протестантите и православните христијани, кои и онака празнуваат недела, ќе настапи како добредојден стожер што ќе ги обедини сите нив, мајката со ќерките, во заедничка христијанска коалиција. Тие и без тоа со сите сили се трудат да докажат дека Христос, кога воскреснал, саботата ја заменил со недела, иако алките на тој нивни синџир од „силни“ докази и аргументи се толку јаки што можат да ги испокинат две гасеници кои влечат во спротивна насока.

Но овде се среќаваме со дилема. За христијаните не е тешко да ја прифатат неделата. Меѓутоа, нејасно и несфатливо е како неа, неделата, ќе ја прифатат иранските фанатици кои ги спалувале американските знамиња и ги терале своите деца низ мински полиња во слава на Алаха, или ортодоксните Евреи во Ерусалим кои ги каменуваат автомобилите што поминуваат во сабота низ нивниот крај, или пак оние други милијарди нехристијани. Како можете нив да ги натерате без отпор да празнуваат недела кога таа е чисто христијански празник и нема ништо заедничко со нив?

Но, иако има дилеми во врска со ова прашање, сигурно е едно – пророштвото е јасно – цел свет ќе ја прифати неделата како ден за одмор и сите што ќе ја прифатат, со тоа добиваат жиг од ѕверот.

Еве едно размислување. Рековме дека огромните природни катастрофи што ќе ја пустат нашата планета и лавините од терор, криминал и тероризам, ќе ги натераат светските политички водачи да им се придружат на светските верски водачи за да најдат решение. Протестантите, католиците, православните, спиритистите, атеистите и научниците, и сите луѓе на светот, панично ќе се обединат да го „смилостиват“ навредениот Бог. Неделниот закон ќе изгледа како вистинска можност за решавање на страшните проблеми со кои ќе се соочуваме – неделата како стожер околу кој светот ќе се обедини да бара излез од таа огромна криза со која ниту една држава не ќе може сама да се справи.

Втора работа, лажните христоси ќе помогнат неделниот закон да се прифати во цел свет. Уште од времето кога Исус рекол: „Еве ќе дојдам скоро!“, христијаните го очекуваат неговото доаѓање, но не се сложуваат околу тоа кога Тој ќе дојде, ниту каде ќе дојде, ниту како ќе дојде, ниту пак што ќе стори кога ќе дојде. Тоа му дава простор и можност на сатаната да манипулира со христијаните и заедно со своите демони во разни делови на светот да се појавуваат меѓу луѓето како лажни христоси, како величествени суштества со блескотен сјај, слично на описот на доаѓањето на Божјиот Син во Откровението 1,13-15. Славата што ќе го опкружува лажниот христос ќе надмине сè што кога и да е видело смртно човечко око и насекаде ќе се разлеваат силни извици: Христос дошол, Христос дошол!

Но, како што е веќе кажано порано, христијаните не се единствени верници кои чекаат спасител. Евреите, будистите, Индусите и муслиманите – сите тие очекуваат да дојде некое натприродно суштество, иден избавител кој ќе се појави по извесен период на буни и ќе му донесе мир и среќа на цел свет. Токму таа сеопшта надеж кај сите народи во избавител кој треба да се појави во последното време може да придонесе и остатокот од нехристијанскиот свет да го прифати последниот мамутски сатански систем на измама во врска со неделниот закон и неделата како Божји ден за одмор.

Да ги замислиме месијанските очекувања на сите заедно – на Индусите, на Евреите, на муслиманите, на христијаните и на будистите, кога ќе се соочат со „жалното време какво што не постоело откако постојат луѓе на светот“, особено затоа што во тоа време на такви силни неволји луѓето и онака го очекуваат – секој својот месија да дојде!

И тогаш, среде таа голема забуна и тревога, сатаната ќе се појави во разни делови на светот во ненадмината слава. Тој доаѓа како „величествено суштество со блескотен сјај“ кај исламскиот свет на начин како што се очекува Махди, и муслиманите му се поклонуваат на своите молитвени килими на својот месија кој ќе најави илјада години мир.

Во слава што надминува сè што видело смртно човечко око тој пристигнува меѓу Индусите кои го гледаат како Калки, како конечна и завршна инкарнација на Вишна.

Евреите се радуваат зашто нивниот долго очекуван Машиаш (месија) конечно пристигнал, не како скромен слуга, туку како моќен натприроден владетел кој ќе ги ослободи од „месијанските неволји“.

Будистите го гледаат Маитреја кој доаѓа да излее благослов врз човештвото! За христијаните тој е Христос. Припадниците на движењето Њу ејџ во него сите тие божествени личности ќе ги видат наеднаш!

Сатаната, кој се претставува како Христос, ќе изнесува длабоки „вистини“, ќе лекува болни и ќе прави чуда. Во исламските земји ќе го цитира Коранот, а пред христијаните ќе зборува за истите оние прекрасни небесни вистини за кои зборувал Спасителот. Секако, бидејќи светот ќе поминува низ страшни неволји, христијаните ќе им кажат на нехристијаните дека сите мораат да прифатат еден заеднички ден во кој ќе го слават Бога, неделата, за да запрат неволјите. Во текот на тие гигантски, речиси непреодоливи измами, сатаната, во ликот на лажниот христос, истиот повик ќе им го упати и на христијаните, тврдејќи дека саботата тој ја заменил со недела. И милијарди луѓе во светот – очајни поради војните, земјотресите, гладот, болестите и бескрајното насилство – ќе ги послушаат пораките на својот долго очекуван „избавител“, ќе прифатат да празнуваат лажен ден за одмор – неделата – и со тоа ќе примат жиг на ѕверот.

И тогаш, кога сатаната ќе ја изнесе својата најголема лага, дека неделата е ден за одмор, ќе може да се појави пред секоја религија како миротворец кого отсекогаш го очекувале. Така тој ќе изгледа како Исус, ќе звучи како Исус, ќе биде облечен како Исус, ќе се однесува како Исус и за најголем дел од светот тој ќе биде Исус. Од неговите усни ќе потечат зборови на љубов – зборови што ќе прелажат речиси секого.

Во продолжение следат поднасловите од поглавјето „Нов светски поредок! Кој, кога, како и зошто ќе го воспостави?“. Кога ќе кликнете врз поднасловите, ќе ви се отворат нивните текстови.