Христос – наш првосвештеник во небесното Светилиште

Многу е значајна вистината дека во небесното Светилиште имаме небесен „Првосвештеник (Христос), кој седна од десната страна на престолот на Величеството на небесата како служител“ во тоа „Светилиште што го подигна Господ, а не човек“.

Прекрасно е опишан нашиот „вечен Првосвештеник“, Христос, и неговата првосвештеничка служба, неговото „вечно свештенство“, во небесното Светилиште: Тој, „свет, невин, непорочен, наполно различен од грешниците и повозвишен од небесата“, кој „сочувствува со нашите слабости“, „влезе еднаш за секогаш во светињата над светињите, не со крв на јарци и јунци, туку со својата сопствена крв, и ни прибави вечен откуп“.

„Со помош на силата на Исусовата крв“, заедно со нашиот Првосвештеник, и „ние слободно можеме да влеземе во светињата над светињите“, и повикани сме „да пристапуваме кон него со молитва и со искрено срце“, „со доверба, кон престолот на благодатта“, кон Божјиот престол, во „Божјиот дом“, во небесното Светилиште, „за да примиме милост“ и спасение, зашто „Тој може да ги спасува за вечни векови оние кои преку него доаѓаат кај Бога, бидејќи секогаш живее за да се застапува за нив“, да „посредува“, да „се зазема за нас“ „пред Божјето лице“. Според тоа, не во исповедална, пред увото на смртен свештеник, туку директно со молитва пред Бога, пред Божјиот престол, во небесното Светилиште, како што нè учат овие библиски текстови.

Да нема забуна! На крстот на Голгота комплетно е исплатена казната за гревот на човештвото и целосно е задоволена Божјата правда кога Христос ги изговорил зборовите „Се сврши!“ Но, фактот што Христос уште два пати ќе ги изговори истите зборови „Се сврши“, јасно покажува дека нашето спасение е континуиран и активен процес што не престанал на крстот кога Христос ги изговорил зборовите „Се сврши!“ Според тоа, планот на спасението на грешниците се одвива во три фази. Првата фаза завршила на Голгота, кога Христос првпат ги изговорил зборовите „Се сврши“ (Јован 19,30). Втората фаза од нашето спасение се одвива сега во небесното Светилиште која наскоро ќе заврши во мигот кога Христос по вторпат ќе ги изговори истите зборови „Се сврши“ (Откровение 16,17). Третата фаза од планот на спасението ќе се одвива за време на небесниот милениум – при неговиот крај, откако гревот и грешниците ќе завршат во огнено езеро, Христос по третпат ќе ги изговори зборовите „Се сврши“ (Откровение 21,6), со што конечно завршува планот на спасението на грешниците, и званично почнува вечноста за праведниците.

Да се вратиме на втората фаза од планот на спасението што се одвива сега во небесното Светилиште, во кое нашиот Спасител влегол со својата пролеана крв на Голгота и во улога на наш небесен првосвештеник таму врши служба на помирување за нас пред Бога.

Ако обрнеме внимание на библиските текстови што ги приведовме, ќе утврдиме дека тие зборуваат за активности што се одвиваат сега, што зборуваат за тековен процес, за фаза од планот на спасението и за настани што се одигруваат во овие мигови.

Значи, Христос е спасител кој „спасува“ сега. Тој е застапник кој „се застапува“ за нас сега и посредник кој „посредува“, кој „се зазема за нас“ „пред Божјето лице“ сега, во овој миг. Ние сме повикани „да пристапуваме кон него“, „кон престолот на благодатта“, кон Божјиот престол, во „Божјиот дом“, во небесното Светилиште, „за да примиме милост“ и спасение сега, во овој миг.

Според тоа, настрана земните храмови, настрана земното свештенство и нивните служби, настрана сите тие земни „симболи на небесните оригинали“, симболи кои успешно ја завршиле својата задача и се повлекле пред своите небесни оригинали кои со Христовата смрт стапиле на сцената на нашето спасение. Затоа, целокупниот наш живот треба да биде насочен кон небесното Светилиште и кон неговите служби каде што се остварува нашето спасение денес, спасение што наскоро ќе ни го донесе Христос со своето второ доаѓање на нашиот свет.

Во продолжение следат поднасловите од поглавјето „На небото имаме небесно Светилиште, небесен храм“. Кога ќе кликнете врз поднасловите, ќе ви се отворат нивните текстови.