Убавината на вистинскиот, од Бога даден секс

Сите претходни перверзни настраности и активности што ги споменавме го банализираат и вулгаризираат вистинскиот, природниот и од Бога даден секс и ја девалвираат неговата вредност, го обезвредуваат највредното во животот на човекот, она што може да му пружи вистинско уживање со највисоки дострели, уживање кое е различно од сите други уживања што ги доживува човекот во другите области од својот живот.

Сексот е една од најсветите човечки функции, под услов да се спроведува според библиските упатства. Една од причините зошто сексот е толку свет е таа што тој има способност да произведе нешто што е над моќта на секоја друга човечка функција – да создаде живо човечко суштество. Затоа уживањата што ги всадил Бог во сексот и што произлегуваат од него се уникатни и неспоредливи со уживањата од другите области во животот, зашто тие произлегуваат од единствената заедница од тој вид што ја создал Бог и што ја нарекол „едно тело“ (1. Мојсеева 2,22-24).

Бог создал машко и женско за да живеат во брачна заедница, во законит брак. Во брачната заедница, двајцата, рамноправни брачни другари, мажот и жената, стануваат „едно тело“. Тоа е природно и убаво. И само во таков, законит брак меѓу машко и женско, сексот, како дел на севкупната љубов што ја всадил Бог во срцето на човекот, има смисла и убавина и е одобрен и благословен од Бога. Бог предвидел сексот да игра многу значајна улога во животот на брачните другари. Вистинскиот секс не е нешто срамно, вулгарно, нечисто и ниско, што го понижува и што го деградира човекот. Напротив, тој го издигнува и го облагородува неговиот живот. Понижуваат и деградираат настраностите што ги опишавме.

Со вистинскиот секс Бог му го осмислува животот на човекот, му го прави интересен, му го гарнира со убави, копнежливи, пријатни и среќни, и со душа и срце очекувани и посакувани мигови. Преку таа извонредо убава, од Бога дадена и создадена активност, човекот се осознава и се потврдува себеси како личност, како човек; како што кажавме, брачните другари, мажот и жената, стануваат „едно тело“, имајќи можност взаемно, меѓусебно да си се даруваат и споделуваат. Човекот е создаден со потреба да се споделува со друг, а бракот му дава можност таа потреба да ја задоволува.

За вистинската убавина на брачната заедница и за брачната љубов како стожер на бракот, да ги слушнеме и овие зборови од Библијата: „Нека е благословен твојот извор, и радувај се со жената на својата младост. Нека ти е како мила срна и како љубезлива кошута; нека те напојуваат нејзините гради во секое време, и нејзината љубов нека те восхитува непрекратно“ (Мудри изреки Соломонови 5,18.19). – Таа љубов е природна, убава и благословена од Бога.

Но, како и сè друго, и оваа, толку убава билка, значајна и доминантна активност во животот на човекот, луѓето ја изопачиле и ја уништиле нејзината суштина.

„Затоа Бог ги предаде на срамни страсти: нивните жени го заменија природното општење со неприродно. Мажите, исто така, го оставија природното општење со жена и се распалија со сладострасност еден кон друг, правејќи – мажи со мажи – срамни работи, добивајќи заслужена плата за својата заблуда“ (Римјаните 1,26.27).

Страшна глетка за Божјите очи! „Господ од небото го набљудува човечкиот род за да види има ли некој што расудува и Бога што го бара? Сите застранија, сите се изродија, нема добар, нема примерен – ниту еден единствен… Луѓето станаа развратни, делата им се гнасни, ниту еден од нив добро не прави!“ (Псалм 14,1-3).

Поради овие силни гревови и беззаконија исчезнале цели народи, поколенија и цивилизации, а поради истите гревови и беззаконија наскоро ќе исчезне и денешната ноева и содомска цивилизација. Пророштвото кажува дека „земјата е онечистена под своите жители, зашто го престапија законот, ја изгазија одредбата, го нарушија вечниот завет“. На „земјата толку ќе ѝ стежне нејзиното беззаконие, што ќе падне и веќе не ќе стане“ (Исаија 24,5.20).

Во продолжение следат поднасловите од поглавјето „Мракобесието на гревот“. Кога ќе кликнете врз поднасловите, ќе ви се отворат нивните текстови.