Војна на небото

Кога гревот фатил длабоки корења и ескалирал во големи размери, Бог бил присилен да го оддалечи Луцифера од својот престол, да го отстрани од своја близина. Тогаш тој со своите ангели, кои му искажале лојалност и преминале на негова страна и под негово знаме, дигнал бунт на небото и стапил во војна против Бога и неговите ангели кои му останале верни и предани, планирајќи со војна да ги постигне своите цели, да изврши небесен пуч, да го урне Божјиот поредок и Божјето царство, сосила да се добере до Божјиот престол и себеси да се прогласи за цар, подигајќи на тој начин свое царство во вселената – „подобро и поправедно“ од Божјето. Таа војна на небото ја гледал во видение апостол Јован.

„И настана војна на небото. Михаел (Христос) со своите ангели завојува против ламјата. Ламјата, пак, и нејзините ангели завојуваа, но не одолеаја и не се најде веќе место за нив на небото. Така големата ламја, старата змија, наречена ѓавол и сатана, кој го заведува сиот свет, беше исфрлен; беше фрлен долу на земјата, заедно со неговите ангели… Затоа, веселете се небеса и вие кои живеете на нив. Тешко вам, на земјата и морето, зашто ѓаволот слезе кај вас со голем гнев, знаејќи дека има малку време“ (Откр. 12,7-9.12).

Неверојатно! Небесен пуч! Расцеп и распад на небесната монолитност! Раскол! Војна на небото! Две огромни небесни војски, дивизии, корпуси – под две различни знамиња; две милионски армии во судир! На чело на двете противставени армии се Михаел (Христос) и Луцифер, кој ја злоупотребил својата слобода и направил погрешен избор, одбрал погрешен пат и се определил за злото. Тој не е веќе оној благороден и мил Луцифер – светлоносец, син на зората, ѕвезда Деница и раскрилен херувим – туку голема и страшна ламја, стара змија, ѓавол и сатана, „одвратно ѓубре“ (Исаија 14,19), „човекоубиец од почеток, лажливец и татко на лагата“ (Јован 8,44), во чиешто срце беснее гнев, завист, омраза и безмерна злоба, силник и воинствено настроен, кој до дното на душата е проникнат со грев и е извор на гревот. Тој ја губи војната и, заедно со своите паднати ангели – сега веќе лоши духови, ѓаволи и демони – се исфрлени од небото и, како вселенски бездомници и бандити, терористи и диктатори, барајќи прибежиште во космосот, ја запоседнале нашата планета и се настаниле на неа.

Во продолжение следат поднасловите од поглавјето „Генезата и подемот на гревот“. Кога ќе кликнете врз поднасловите, ќе ви се отворат нивните текстови.