Десет Божји заповеди

I
Јас сум Господ, Бог твој, кој те изведов од земјата египетска, од домот на ропството. Немој да имаш други богови освен мене!

II
Не прави си идол, ниту каква и да е слика од она што е горе на небото, или долу на земјата, или во водите под земјата! Немој да им се клањаш ниту да им служиш! Зашто јас, Господ, Бог твој, сум Бог љубоморен, кој ги казнувам гревовите на татковците – гревовите на оние кои ме мразат – кај децата до трето и четврто колено, а покажувам милост кон илјадници кои ме сакаат и ги држат моите заповеди.

III
Не изговарај го напразно името на својот Господ Бог, зашто Господ нема да го остави без казна оној што го изговара неговото име напразно!

IV
Помни си да го празнуваш саботниот ден! Шест дена работи и сврши ги сите свои работи! А седми ден е сабота, одмор посветен на твојот Господ Бог. Тогаш немој да работиш никаква работа: ни ти, ни твојот син, ни твојата ќерка, ни твојот слуга, ни твојата слугинка, ни твојот вол, ни твоето магаре, ниту придојдениот што ќе се најде во твојот дом! Зашто Господ за шест дена ги создаде небото, земјата, морето и сè  што е во нив, а во седмиот ден се одмори. Затоа Господ го благослови и го посвети саботниот ден.

V
Почитувај го својот татко и својата мајка за да живееш долго на земјата што ќе ти ја даде твојот Господ Бог!

VI
Не убивај!

VII
Не врши прељуба!

VIII
Не кради!

IX
Не сведочи лажно против својот ближен!

X
Не посакувај ја куќата на својот ближен! Не посакувај ја жената на својот ближен; ниту неговиот слуга, ни неговата слугинка, ни неговиот вол, ни неговото магаре, ниту што и да е од она што му припаѓа на твојот ближен! (2. Мојсеева 20,1-17).

Откако ги изговорил Бог Десетте заповеди, уследило нешто многу, многу значајно! Истите заповеди, како што кажавме, ги напишал не на дрвени, ами на две камени плочи кои симболизираат непроменливост и цврстина – трајно да се вреже мислата длабоко во сеќавањето и во свеста на луѓето во сите времиња дека тоа е Божји, а не Мојсеев или човечки закон.

„Кога Господ го сврши разговорот со Мојсеја на Синајската гора, му даде две плочи на сведоштвото, плочи камени, напишани со прст Божји.“

„И Мојсеј беше таму со Господа четириесет дена и четириесет ноќи. Ниту леб јадеше ниту вода пиеше. И Господ ги напиша на плочи зборовите на заветот – Десетте заповеди.“

„Тогаш Мојсеј, слегувајќи од гората, се врати со двете плочи на сведоштвото во своите раце. Плочите беа испишани на двете страни; испишани и од едната и од другата страна. Плочите беа дело Божје; писмото беше писмо Божје, врежано на плочите.“

„И плочите ги ставив во ковчег што го направив, и тие останаа таму, како што ми заповеда Господ.“

За тој закон, за тие заповеди Исус вели: „Навистина, ви велам, додека постојат небото и земјата, ниту една јота или цртичка од законот нема да се измени!“ (2. Мојсеева 31,18; 34,28; 32,15.16; 5. Мојсеева 10,5; Матеј 5,18).

Божјиот закон е совршен, што значи во него не постои дупка и можност за манипулација како кај земните закони. Словото на шестата заповед кажува „не убивај“. Но нејзиниот дух оди понатаму и удира во зародишот кој се развива како мисла во умот на убиецот и план кој води кон убиство. Заповедта дејствува превентивно така што на време го предупредува човекот кој пошол на пат да направи убиство, сопирајќи го да не го изоди патот до крај за да направи таков тежок грев. Таа уште од почеток го опоменува: Секој што се гневи, што завидува, што мрази, што планира одмазда – прави убиство.

Истото важи и за седмата заповед за која читаме дека секој што ќе погледне во туѓа жена со желба, веќе направил прељуба во своето срце, со што Исус удира во коренот каде што го сече гревот наречен прељуба. Тоа важи и за другите Божји заповеди.

Според тоа, грешникот не може да најде празнина ниту во една од Божјите заповеди и оправдание да прекршува која било од нив, како што наоѓа, како што рековме, многубројни празнини и дупки во сите човечки земни закони за да ги оправда или, во краен случај, да си ги олесни своите законски престапи пред земните судови.

Во продолжение следат поднасловите од поглавјето „Божјиот закон – Десетте Божји заповеди“. Кога ќе кликнете врз поднасловите, ќе ви се отворат нивните текстови.