Зад ликот на Марија се кријат спиритистички појави 5

Во последните денови во католичкиот и православниот свет доминантни ќе бидат спиритистичките појави поврзани со приказанијата на Исусовата мајка Марија, Света Богородица или Дева Марија, кон која, како што кажавме порано, ние имаме висока почит и уважение. Видовме дека сатаната се појавува и ќе се појавува пред луѓето како Христос (лажен христос) и како некој од старите библиски пророци и апостоли. Замислете, пред вас се појавува пророк Еремија или апостол Петар, кои не само што ќе тврдат дека се Еремија и Петар, туку така и ќе се чувствуваат.

Но, во многу голема мера сатаната во последните денови ќе го користи ликот на Марија, која чесно ја завршила задачата што ја поставил Бог пред неа – го родила Христа и го одгледала во неговото детство – и сега лежи во својот гроб и, како и секоја друга жена, која верно и предано му служела на Христа, чека воскресение.

Меѓутоа, сатаната успеал преку црквата Марија да ја прати на небото за да може непречено да манипулира со неа, да го користи нејзиниот лик зад кој се кријат негови демони кои во нејзино име прават и сè повеќе ќе прават безброј непобитни, но лажни чуда. Истото тоа важи и за света Петка и за света Недела и за секоја друга света „светица“ или свети „светец“.

Во светот постојат многубројни светилишта на Католичката црква посветени на Марија, меѓу кои најважни се светилиштата Лурд во Франција, Гарабандал во Шпанија, Фатима во Португалија и Меѓугорје во Херцеговина, каде што наводно им се појавува Марија на одделни визионери, меѓу кои и на деца, со свои пораки од небото. Пораките од Фатима црквата ги прифаќа како службени пораки што ѝ ги праќа Христос преку својата мајка Марија, и „нејзините“ пораки се многу ценети.

Култот на Марија е цврст столб врз кој се потпираат Католичката црква и православието и, како што рековме, тоа му дава огромни можности и шанси на сатаната да се крие зад нејзиниот толку ценет и почитуван лик кај нивните верници и да прави лажни знаци и чуда за да ги прелаже и да ги заведе на погрешен пат.

На 13 мај 1917 година три деца, Франсиско Марто (9 години), Јасинта Марто (негова сестра, 7 години) и Лусија Сантос (10 години), паселе овци близу до едно португалско село, Фатима. Одненадеж забележале светкавици, а неколку мига подоцна, над еден близок даб се појавила убава, млада жена. „Не плашете се“, им рекла, „нема да ве повредам. Јас сум од небото.“

Од тој миг почнуваат нивните контакти со Марија во Фатима која се промовира и прераснува во најпрочуено католичко светилиште посветено на Марија која со своите приказанија привлекува милиони верници на поклонение каде што ги задоволуваат своите духовни потреби, доживуваат посебна духовна релаксација и наводни исцелувања од многу болести.

Покрај другото, децата виделе зраци на светлина како излегуваат од нејзините отворени раце. Еднаш Лусија покажала кон небото. „Еве, доаѓа жената!“ Возрасните гледале како гранките на дабот се свиткуваат, иако не ги пофатила човечка рака. Кога средбата била завршена, возрасните биле убедени дека децата зборуваат со Девица Марија и надалеку се расчула сторијата за овој настан. Веста бргу се раширила низ целата област.

Во друга пригода Марија ги подала рацете, а од нив излегувала светлина. Лусија рекла дека светлината навлегла во земјата и добила видение за пеколот. „Го виде пеколот каде што заминуваат душите на кутрите грешници“, ѝ рекла жената. „За да ги спаси, Бог сака во цел свет луѓето да му упатуваат молитви на моето безгрешно срце.“ – Спротивно на Библијата, демонот кој стои зад ликот на Марија овде тврди дека грешните одат во пекол, и второ, луѓето ги повикува, наместо на Христа, молитви да ѝ упатуваат на Марија! Марија на неколку визионери им кажала „да се молат за душите во чистилиштето“ – пак небиблиска порака.

На 13 август истата година 1.500 луѓе виделе топка од светлина како се движи на небото доаѓајќи од исток и како се спушта врз дабот.

На 13 септември се појавиле 30.000 луѓе. Тие исто така виделе топка од светлина како се спушта врз дабот и сјајни снегулки како паѓаат низ воздухот како снег. Жената го повторила своето ветување за чудо на 13 октомври.

Тоа утро, на 13 октомври, од небото истурал дожд како река. Сепак, повеќе од 75.000 луѓе дошле да го видат „чудото“. Не биле разочарани. Децата пак ја виделе „жената“ која, заминувајќи, ги отворила рацете. Овојпат зраците на светлината биле насочени кон сонцето. Додека луѓето го посматрале сето тоа, сонцето почнало да бледнее и станало како сребрен диск на небото. Од него во сите правци се ширеле зраци со различни бои: црвени, сини, жолти, зелени – сите бои од сончевиот спектар. Одненадеж сонцето се претворило во џиновско пламено тркало кое мошне бргу се вртело околу својата оска. Диво играло на небото, а потоа, на луѓето кои гледале им се чинело како да се ослободило од својата орбита и почнало да паѓа кон земјата. Станало сино, а потоа жолто. Набргу низ целата околина почнале да паѓаат жолти дамки.

Еден новинар објавил дека „народот… гледал во сонцето кое треперело и правело нагли и нечујни скокови, надвор од сите космички закони. Сонцето буквално изгледало како да игра на небото“.

Откако поминало ова натприродно приказание, сонцето се вратило на своето место на небото, дождот престанал и облаците ги снемало. Присутните луѓе, кои од дождот биле мокри до гола кожа, забележале дека облеката им е наполно сува. Не само тоа, почвата била наполно сува, иако до пред петнаесетина минути насекаде имало длабоки бари и до десетина сантиметри!

Постојат реални можности сатаната да прикаже лажни знаци и да инсценира лажни приказанија на небото од типот на оној „голем знак на небото: жена облечена со сонцето и со месечината под нејзините нозе, а на главата имаше круна од дванаесет ѕвезди.“ Жената е бремена и очекува да се породи. До неа стои голема црвена ламја со седум глави и со десет рогови, а на нејзините глави седум круни. Ламјата чека жената да се породи за да ѝ го проголта детето (Откровение 12,1-6). Ова е библиска сцена која нема ништо заедничко со Марија како жена. Со неа Бог ја прикажува својата вистинска црква – чиста како сонцето, која живее според апостолската наука (дванаесетте ѕвезди на главата – науката на дванасесттемина апостоли).

Но, на сатаната не му пречи да ја злоупотреби оваа библиска сцена, да го земе ликот на Марија, да се скрие зад него, да се облече во привидно сонце, да стави привидна месечина под нозете и круна на главата со дванаесет ѕвезди, и од небото да се прикаже пред светот како Богородица или Дева Марија и на луѓето да им упати лажни, небиблиски пораки. Всушност, таква жена облечена во сонце и се појавува насекаде по цел свет, нудејќи им на луѓето „сигурно“ пристаниште во своето „безгрешно“ срце.

Во продолжение следат поднасловите од поглавјето „Библијата за матните води на спиритизмот“. Кога ќе кликнете врз поднасловите, ќе ви се отворат нивните текстови.