Со чија помош спиритизмот ќе го стави светот под свој чадор?

Се прашуваме како сатаната ќе го стави цел свет под влијание на спиритизмот кога мнозинството конзервативни протестанти и многу конзервативни католици се длабоко свесни за опасноста од спиритизмот на популарното движење „Њу ејџ“ (New Age – Нова доба) чијашто суштина е спиритистичка, движење кое ги асимилира сите религии на светот, со што ги омасовува своите редови и станува сè повеќе популарно на светската сцена. Веруваме дека еден од најзначајните начини со чија помош сатаната ќе го стави светот под свој диктат се токму овие таканаречени приказанија на Дева Марија. Најпосле, што може да биде поутешно и помило за срцето отколку Исусовата мајка да општи со човечкиот род, пренесувајќи му пораки од него (од Исуса!). Тогаш како може некој да се осмели да ѝ се противстави на таа прекрасна „вистина“!?

Бидејќи лошите духови се преправаат дека веруваат во Библијата и ќе покажуваат почит кон прописите на Црквата, нивното дело ќе биде примено како откровение на Божјата сила.

Католиците и православните, кои се фалат со чудата како сигурен знак дека нивната црква е од Бога, ќе бидат лесно прелагани од оваа сила која прави чуда, а протестантите, отфрлајќи го штитот на вистината, Библијата, ќе бидат исто така прелагани бидејќи и тие веруваат дека мртвите не се мртви, туку дека живеат во рај или во пекол? Таа нивна граница меѓу спиритизмот и состојбата на мртвите е многу растеглива и нејасна и нивната меѓа е подвижна. Што е за нив спиритизам и како би го дефинирале тие овој феномен? Како го дефинирал спиритизмот Били Грејем и зар тој не ја преминал неговата граница и не зашлапал во него (во спиритизмот) кога разговарал со својата покојна баба? Нашите браќа протестанти немаат бедем да ги заштити од силната поплава на спиритизмот кој ќе го стави светот под свој чадор? Тврдиме дека тој и нив ќе ги повлече во својата мрежа и ќе ги удави!

Кога Црквата еднаш ќе потврди дека приказанијата на Дева Марија се вистински и натприродни, тогаш сите католици ќе бидат натерани да ги прифатат нивните пораки како да се од Бога, иако за нив вистинската Марија не знае ништо, бидејќи таа е в гроб и чека воскресение. Но, кога Марија ќе воскресне во првото воскресение и кога ќе види како демоните низ тие лажни приказанија се криеле зад нејзиниот лик и го злоупотребувале, а луѓето тоа го прифаќале како вистина, ќе се чуди со големо чудо и никогаш не ќе може доволно да се начуди.

Сите овие приказанија и средби со Марија, иако изгледаат како вистински натприродни настани, всушност се директни средби со сатаната, чиста сатанска измама, и ништо не пречи дали некој верува во една од нив или во сите. Тој ќе биде прелаган.

По цел свет, во редовите на обичните верници се забележува вистински подем на вера во Дева Марија. Милиони обожаватели се ројат околу нејзините светилишта, а многу меѓу нив се млади. Се формира меѓународно маријанско здружение на свештеници кое ја промовира пред светот Марија, како што е веќе кажано, како „небесна кралица“, како „кралица на мирот“, со пространо, „безгрешно“ мајчинско срце, во кое го повикува светот да најде мир и единство. Марија е „мајка на сите живи“, „посредничка на секоја милост“, „семилостива спасителка“, „милостива мајка на светот“, помилостива и од Христа, која ден и ноќ го моли Синот за спасение на светот.

Марија „се повикува во Црквата со титулата адвокат, помошник, добротворка и посредничка“7.

Како што кажавме, Фатима е најпознато католичко светилиште каде што се појавува Марија, но тоа во никој случај не е и единствено. Многу луѓе тврдат дека ја виделе Девицата. Навистина, за последните 15 или 20 години, речиси во секоја земја на светот луѓе тврдат дека ја виделе неа лично, или нејзините статуи и икони како плачат, ронат човечки солзи или од нив течат крвави капки пот. Вакви појави се видени во Франција, Никарагва, Украина, Кореја, Соединетите Држави, Канада и Италија итн.

Никнуваат нови, современи, небиблиски пророштва. Од сите страни на светот, како никогаш до сега, пристигнуваат информации за нови, масовни приказанија на Марија. Слушаме за милиони преобратени животи, пренасочени од световното кон духовното; имаме извештаи за физички, ментални, морални и духовни исцелувања. Врз основа на силните раскажани искуства на оние кои стапиле во допир со неочекуваното и натприродното, спонтано настанува цела една нова култура, се јавува една нова ера, ера на Дева Марија или Богородица, во која таа доминира и ќе доминира со своите лажни, демонски приказанија.

„Во своите силни екуменски пораки, во различни приказанија, Марија истакнува дека нејзините пораки се наменети за сите народи, за цел свет, а не само за католиците. Марија кажува дека Католичката црква располага со најцелосен доказ за многу дарови дадени на човештвото за спасение, но сепак, таа е мајка на сите луѓе на земјата.“8

Но бидејќи, како што видовме, таа своите клиенти ги упатува на разговор со мртвите и во своите приказанија зборува за пеколот и чистилиштето, „таа“ не е ништо друго освен лажна Марија, сатански дух, медиум меѓу живите и мртвите.

Во продолжение следат поднасловите од поглавјето „Библијата за матните води на спиритизмот“. Кога ќе кликнете врз поднасловите, ќе ви се отворат нивните текстови.