Сатаната ве разболува, сатаната ве лекува

Читавме за жалната состојба на момчето опседнато од демон. Таа состојба кај детето целосно ја предизвикува демонот кој се наоѓа во него. Демонот го фрла момчето на земја, тој го вкочанува, тој го тера низ вода и оган за да го погуби, тој го тера да чкрта со забите и да му тече пена од устата… Демонот кој е во вас кај вас предизвикува очајна состојба. И што понатаму? Вие одите кај гледач или бајач да ве ослободи од тие стеги, не знаејќи дека тие сатански асистенти или медиуми, спиритисти, што веќе ги набројавме, се во директна спрега со сатаната и со неговите демони. И што се случува? На пример, сатаната или демонот ве вкочанил. Бајачот ви прави метании и демонот излегува од вас, со што ве откочанува.

Или, нечистиот дух или демонот во вас ве онемел, ви го врзал јазикот и вие не можете да зборувате. Одите кај вражалка која изведува некакви активности и демонот излегува од вас, при што јазикот ви се одврзува и вие почнувате да зборувате. Или, одите кај гледач на кафе или на икони за некоја друга мака што ви ја создал демонот, односно ѓаволот. Со своите волшебства гледачот привидно ве ослободува од маката.

Сценаријата за сите овие примери што ги наведовме ги создава, ги режира и директно во нивната изведба учествува сатаната. Неговите слуги, споменатите медиуми, спиритисти, се само маша, маскоти во неговите раце, без никаква сила да управуваат со ситуацијата и без моќ директно тие да ги разрешуваат проблемите со кои се соочуваат опседнатите луѓе. Сатаната нив ги користи само како видливи посредници со чија помош привлекува и регрутира цели армии луѓе во спиритизмот. Нивните метании и активности ги крунисува со привиден успех за да бидат привлечни и кај неупатените да остави силен впечаток дека тие се Божји слуги кои своите божемни успеси ги постигнуваат со Божја помош, иако Бог нема никаква врска со сето тоа. Напротив, видовме дека Бог најстрого ги осудува сите сатански слуги и нивните активности со кои ги заведуваат луѓето на погрешен пат.

Да нема забуна! Сите метании што ги прават слугите на сатаната – вражбите, гатањето, баењето, магиите, хипнозата, клетвите, амајлиите, уроците и сите други нивни терапии и активности – се најобична форма, без никаква суштина и значење за демоните кои ниту ги прифаќаат ниту пак постапуваат според нив. Тие се само привлечен трик, мамка и опасна стапица, подмолна игра и средство со кое демоните им даваат авторитет на своите медиуми, на своите асистенти и маскоти, за да соберат што поголем број жртви во своите мрежи.

Голема невистина и лага е да се мисли дека спиритистите лекуваат, зашто ниту тие, ниту нивните метании, немаат никаква моќ да лекуваат и да истеруваат демони од луѓето кои се опседнати од демони. Со други зборови, демонот ве вкочанил, демонот ве откочанува, наполно независно од метаниите на бајалецот или гаталецот. Или, нечистиот дух ви го врзал јазикот за да не можете да зборувате и истиот дух ви го одврзува јазикот и вие почнувате да зборувате. Тој тоа го прави наполно независно од сите метании што ви ги сервира вражалката. Демоните се наполно независни во своите активности, оставајќи само впечаток дека нивните слуги со своите вражби и терапии ве ослободуваат од тие напасти што ве снашле откако сте зашлапале во нивните спиритистички води.

Рековме дека сатаната користи видливи медиуми со видливи метании затоа што луѓето сакаат да видат нешто видливо и опипливо, макар тоа да е и лажно. Од друга страна, мрачните сили, односно демоните, иако често се престоруваат и пред луѓето се појавуваат како најразлични видливи суштества, дури и во вид на светлосни ангели (2. Коринќаните 11,14), тие по природа се невидливи за човечките очи, што за нив е своевидна предност, бидејќи како невидливи се многу посилни и поопасни, зашто не знаете како и од која страна ќе ве нападнат.

Голема илузија е ако мислите дека бајалците, гаталците, гледачите на дланка, на кафе, на икони, на тарот карти, астролозите, маѓепсниците, и сите други сатански слуги, можат засекогаш да ве ослободат од тешкото ропство на мрачните сили во чиишто канџи сте паднале. Пред нивните метании демоните навидум се повлекуваат од вас и вие чувствувате извесна релаксација и подобрена здравствена и општа психичка состојба, радувајќи се и мислејќи дека засекогаш сте се решиле од нив. Но тоа е голема заблуда.

Запомнете, демоните никогаш нема да ве напуштат сè додека Бог не интервенира во ваша полза на ваша искрена молба. Тоа што повремено демоните ги олабавуваат своите стеги околу вас за да здивнете од преголемиот товар што го носите на себе и во себе, во никој случај не значи дека тие се повлекле од вас пред силата на метаниите на нивните слуги. Со тој чин на нивно дозирано повлекување од вас тие само им излегуваат во пресрет на своите медијатори за да им го подигнат угледот и авторитетот пред народот сè со цел да го наполнат својот кош со маса нови клиенти.

Кога демоните наводно се повлекуваат од вас, тие всушност приготвуваат поинаква тактика со поинакви, поефикасни потези, поставуваат нови габарити и темели за друга, нова и пострашна ситуација од претходната, во која уште повеќе ги зацврснуваат своите позиции кои им овозможуваат уште подлабоко да се вгнездат во вас и уште посилно да ја вклештат вашата душа во своите стеги од кои навистина ви нема друг спас освен Господ Исус Христос да ви дојде на помош, како во случајот со момчето опседнато од демон кој не можеле да го истераат од него дури ни апостолите.

Во продолжение следат поднасловите од поглавјето „Библијата за матните води на спиритизмот“. Кога ќе кликнете врз поднасловите, ќе ви се отворат нивните текстови.