Повеќе за приказанијата на Марија

Најпрочуени приказанија на Марија во текот на втората половина на дваесеттиот век се случиле во малечкото место во Херцеговина, Меѓугорје, каде што шест деца од едно малечко село секој ден ја гледале Дева Марија, Богородица, и од неа примале пораки уште од 1981 година. Според некои проценки, тоа зафрлено село го посетиле 15 милиони поклоници и 15.000 свештени лица. Додека Фатима била најзначајно место од тој вид во првата половина на 20 век, Меѓугорје ги задоволува духовните потреби на оваа генерација во поново време.

Не треба да ги отфрлиме сите тврдења на приказанијата на Марија како глупост на лековерните луѓе. Децата од Фатима неколку месеци однапред преткажале дека на 13 октомрви 1917 година ќе се случи чудо и 75.000 луѓе виделе како тоа се исполнило. Навистина, два световни весника, кои до тогаш ги исмевале детстките кажувања, известувале во подробности за настаните што се случувале на 13 октомври. На тој начин, не е можно настаните од Фатима да се прикажат како измама. Ние мораме сериозно да ги прифатиме. Нешто натприродно – нешто чудно – се случило барем во некои подобро познати приказанија, а веројатно исто така и во некои од оние помалку познатите.

Да се потсетиме – Светото писмо е јасно кога кажува дека лажните чуда ќе бидат една од главните измами на сатаната за да го прелаже светот во последното време. Веќе чувме како Исус кажал дека „ќе се појават лажни христоси и лажни пророци (од рангот на Саи Баба, а и поголеми), па ќе прават големи знаци и чуда, за да ги заблудат, ако е можно и избраните“ (Матеј 24,24). Апостол Павле преткажал дека ќе се појави беззаконик преку кого ќе дејствува сатаната „со сила и со чудесни знаци и со лажни чуда, и со секаква неправедна измама за оние кои гинат“ (2. Солуњаните 2,9.10).

Но, најголемо богохулно учење кое постојано се повторува во овие приказанија на таканаречената Дева Марија е тоа што таа е откупител и посредник заедно со Исуса. Еден католички писател, кој е типичен за католичкиот свет, напишал:

„Бидејќи нашето спасение е извојувано во срцето (на Марија) и преку нејзиното срце, очигледно е дека после Бога и неговиот Син Исус, ова е прв темел од кој не можеме да се одделиме без да се соочиме со очигледна опасност од пропаст и вечно проклетство… Исто така ние најпрво му се посветуваме на најсветото Исусово срце, на Богочовекот, а потоа на пречистото срце на Марија која е соединета со Исуса во делото на спасението… Затоа, милосрдието на Марија која страда со Христа… е суштина на нејзиното дело на страдање и откуп.“6

Примерите што ги наведовме за лажните учења на таканаречената Дева Марија се доволни да убедат секого дури и со делумно сфаќање на библиската вистина дека овие приказанија не се од Бога. Неизбежен е заклучокот дека зад нив стојат сатаната и неговите демони, користејќи го ликот на Марија како маска зад која се кријат, а тоа им оди од рака бидејќи католиците и православните цврсто веруваат дека Марија не е во гроб, туку на небото.

Поради небиблиската природа на приказанијата на Марија, ако причината за потеклото е натприродна, тогаш можеме само да имаме работа со демоните, а не со Бога.

Свесни сме дека ова што го кажуваме за Марија можеби е неприфатливо за многу католици и православни, но сепак, веруваме дека е потребен овој теолошки заклучок.

Ние живееме токму во последните денови од земната историја; силите на злото бргу се поврзуваат меѓусебно за конечниот судир, па мораме да го предупредиме Божјиот народ дека го чека голема измама која ќе го привлече вниманието речиси на целиот свет.

Истиот случај на визионерите од Фатима го среќаваме и кај визионерите од Меѓугорје – некои и од нив виделе, разговарале, па дури и допреле луѓе кои умреле. Иванка тврди дека во неколку наврати ја прегрнала и ја бакнала својата умрена мајка. Во текот на еден интервју Иванка опишала две средби со својата мајка: „Трипати ја видов мајка ми откако умре! Најубаво време ми беше минатиот пат кога таа беше со блажената мајка Марија. Мајка ми дојде до мене, ме прегрна и ме бакна. Рече: ‘О Иванка, толку се гордеам со тебе!’“

Како може ова да се сообрази со изричната библиска забрана и строга осуда за оние кои разговараат со мртвите? Зар Марија дејствува спротивно на Библијата? Зар таа не знае дека Бог забранува секаков разговор со мртвите? Зар Бог би ѝ дозволил нејзе да биде на небото и од таму да дејствува спротивно на неговата Реч, да ја гази неговата заповед, низ приказанија луѓето да ги повикува да разговараат со мртвите? Во никој случај! Очигледно е дека зад ликот на вистинската Марија, која мирно почива во својот гроб, се крие лажна Марија, односно ѓаволски духови, сатански демони, на кои сè им е можно (5. Мојсеева 18,10-12; Исаија 8,19; 1. Дневникот 10,13.14).

Во продолжение следат поднасловите од поглавјето „Библијата за матните води на спиритизмот“. Кога ќе кликнете врз поднасловите, ќе ви се отворат нивните текстови.