Постари, потрадиционални облици на спиритизмот 1

Спиритизмот е најсилно и најуспешно средство во рацете на сатаната со чија помош тој се поигрува со светот како мачка со глушец! Божјата реч за него кажува:

„И не е чудно, зашто сатаната се претвора во светлосен ангел.“ А Христос најавува: „Ќе се појават лажни христоси и лажни пророци, и ќе прават големи знаци и чуда, за да ги заведат, ако е можно, и избраните“ (Матеј 24,24; 2. Кор. 11,14).

Забележавме, нели: „Сатаната се претвора во светлосен ангел“, блескотно суштество со натприроден карактер пред кое луѓето остануваат без здив, и „лажни христоси и лажни пророци кои ќе прават големи знаци и чуда“ за кои луѓето не се подготвени реално да ги согледаат и сфатат, туку ќе ги прифатат како силна манифестација на Светиот Дух, како чуда што доаѓаат од Бога и – ќе бидат прелагани!

Ќе посочиме некои од лажните чуда што ги прави сатаната со своите демони. Меѓу тие феномени спаѓа појавата – маса удира по под со посебен, точно одреден ритам, при што се пренесуваат пораки од „светот на духовите“. Слична е и појавата при која чаша шета по стаклена површина на која се напишани букви. Во иста група спаѓаат и „зборувањето во транс“ и „автоматското пишување“. Во првиот случај се работи за манифестација на вонсетилни сили преку медиуми, човечки посредници, во транс. Медиуми се луѓе проникнати со сатански или ѓаволски дух, што ги користи сатаната како свои орудија преку кои зборува и ги реализира своите замисли, планови и акции, односно, преку кои ги пласира своите лаги.

Медиумите во транс добиваат неверојатно точни информации кои вчудовидуваат, со што ја утврдуваат верата на оние кои комуницираат со мртвите.

Кај медиумите во транс често може да се установи појава на ксеноглосија – способност на медиумот да зборува странски јазик со кој инаку не се служи – како, на пример, кај Тереза Нојман(Theresa Neumann),, која зборувала арамејски јазик.

Денес оваа спиритистичка појава, зборување на странски јазици, во светот прераснува во силно харизматично движење кое е многу раширено во Католичката црква, а сè повеќе ги опфаќа и протестантскте цркви, и истото прераснува во моќно средство за нивно обединување. Таму каде што не помага ниту едно друго средство за обединување на разнебитеното христијанство, многу силен и ефикасен е спиритизмот.

Ете, велат многубројните „полиглоти“, меѓу кои и многубројни свештеници од висок црковен ранг, ние добиваме дар, Светиот Дух, како и апостолите на Духовден, и зборуваме странски јазици како и тие.

Да, само тука постои огромна разлика. Апостолите добиле Свети Дух од Бога кој ги надарил со за нив непознати странски јазици за да им го проповедаат евангелието на народите на нивниот мајчин јазик, и така правеле (Дела 2,1-11). А денешните, пак ќе кажеме „полиглоти“, откако ќе го добијат божемниот „свети дух“, паѓаат во верски занос и почнуваат да зборуваат мртви, загубени, непознати и таинствени јазици кои никому не му се мајчин јазик и со нив никому не му го проповедаат евангелието. Затоа оваа појава, со која сатаната му парира на Светиот Дух, излеан врз апостолите на Духовден, е ѓаволска, спиритистичка појава.

При појавувањето на „автоматско пишување“ медиумот, без учество на својата свест, пишува пораки што му ги диктира духот под чиешто влијание се наоѓа. Д-р Хенрих (Henrich) во својата книга „Мртвите живеат“ зборува за медиумот по име „Менсфилд (Mansfield), кој во будна состојба пишувал истовремено со двете раце на два различни, за него непознати јазици, и при тоа водел жива конверзација.

Друга многу раширена спиритистичка појава е појавата наречена телепатија или видовитост. Филозофот Јунг-Штилинг во својата книга „Наука за духовите“(Geisterkunde) опишува случај на телепатија: Полскиот крал Август II бил голем пријател со прускиот крал Фридрих Вилхем I (Friedrich Wilhelm)и со неговиот фелдмаршал фон Глумбков (von Glumbkow). Околу три часот ноќе, на 1 февруари 1733 година, фон Глумбков одненадеж при ноќна светлина забележал појава во која го препознал кралот Август кој му рекол: „Драги мој Глумбков, токму сега јас издивнав во Варшава!“ Фелдмаршалот веднаш ја запишал веста и му ја пратил на прускиот крал.

Четириесет и шест часа потоа пристигнал весник од Варшава носејќи тажна вест за смртта на полскиот крал. Кога го споредиле времето во кое се појавило приказанието и часот на смртта, се видело дека двете времиња точно се совпаѓаат.

Хилда Вивер, клинички психолог, која порано не покажувала никаков интерес за паранормалните појави, раскажува

за својата средба:

„Една вечер се наоѓав во мојата канцеларија и пишував прилог за професионалните весници. Го подигнав погледот и го видов Елвис Присли како седи карши мене во удобната темна фотелја во која обично седат моите пациенти… Можам да ви кажам дека си помислив оти со мене нешто не е во ред. Тоа ме изненади, зашто во тоа време си мислев дека се наоѓам на самиот врв на светот: психолог со сопствена ординација, мошне успешна, мошне интелигентна… Почна да разговара со мене, да комуницира. Рече: ‘Дали сте задоволни со својот живот, госпоѓице?’… Потоа извесно време разговаравме. Голем дел од тој разговор беше со лична природа, нешто што и сега не би го поделила радо со другите… Инстинктивно ја наведнав главата и ги склопив рацете како да се молам. Кога повторно го подигнав погледот, него веќе го немаше. И никогаш веќе не го видов. Повремено пуштам по некоја од неговите плочи и го слушам.“

И кај астрологијата (читање на судбината на човекот од меѓусебната положба на ѕвездите), астромантијата (гатање, преткажување на иднината со помош на ѕвездите), кај јасновидците, хороскопите, рабдомантијата (откривање на скриени работи под земја, особено извори, со помош на стапчиња), кај хиромантијата (гледање во дланка, преткажување на иднината според цртите на дланката), кај читањето на карти, гледањето во филџан кафе итн., покрај многу измама и шарлатанство, може да се најде и појава на спиритизам.

Не е спорно дека меѓу најчудните појави на окултизмот се вбројуваат таканаречените „материјализации“. Професорот Грубер во своето дело „Парапсихолошки сознанија“(Parapsychologische Erkenntnisse) за тоа изјавува: „Телекинезата и материјализациите се факти што ги признава природната наука. Некои луѓе во одредени околности имаат способност, без учество на која било телесна функција, да дејствуваат врз предметите во својата околина, преместувајќи ги или менувајќи им го обликот. Освен тоа, можат да создаваат нови облици од непозната материја, помалку или повеќе високо организирана, кои можат да се видат и опипаат. Тие нови творби понекогаш светат со сопствен сјај и во многу случаи имаат облик на човечко тело или на некој негов дел. Овие материјализации настануваат и исчезнуваат мошне бргу.“

Во  најголем број случаи оваа појава настанува постепено. Д-р Кох(Koch) пишува: „Во првиот стадиум се јавува силно вртење и создавање на некаква маглива, слузеста супстанца, еластична како каучук, која излегува од телото на медиумот.“2

Научникот Шренк-Ноцинг (Schrenck-Notzing) објавил за тоа опширно дело илустрирано со слики направени со помош на блескава светлина. Во вториот стадиум безобличната материја добива облик. Освен слики, на некои им успеало да направат и парафински отпечатоци на овие творби. Третиот стадиум претставува згуснување на оваа материја во појави слични на видение кои како фантоми се појавуваат во близината на медиумот. Во четвртиот стадиум доаѓа до феноменот телекинеза, односно до раздвижување на предметите со помош на непозната сила и до апорт, односно до преместување на истите од едно на друго место.

Една од најпрочуените сеанси на модерниот спиритизам, што ја одржал медиумот Еусапија Паладино во присуство на најголемите научници на своето време – Анри Бергсон, Марија Кири (Maria Curie), Шарл Рише (Charles Richet)  и други – била сензационална по својата содржина. Иако медиумот бил опкружен со електрично поле, чиешто пробивање веднаш би го регистрирале најпрецизните електроскопи, му успеало да предизвика дигање на тешки маси кои формално летале, заобиколувајќи ги сите присутни. Еден ковчег, тежок седум килограми, сам преминал од една маса на друга, празни кутии од цигари фучеле летајќи од едниот на другиот крај на просторијата, чашите ѕвечеле, а една оддалечена харфа свирела прекрасна мелодија.

Преку австрискиот медиум Марија Силберт се јавувал дух кој себеси се нарекувал Нел. Професорот Фишл (Fischl) за тоа пишува: „Нел стекнал популарност затоа што давал автограми, врежувајќи го своето име на поклопци од часовници, на медалјони, на кутии за цигари и слично.“3

Овде спаѓа и способноста на одделни медиуми во состојба на транс да поминуваат низ цврста материја. На сеансите на медиумот Мадам д’Есперанс (Madame d’Esperance) се случувало, на пример, додека медиумот седи во кабинет, надвор од просторијата да се материјализира приказание кое конечно добива облик на женско суштество кое слободно се движи меѓу посетителите на сеансата.

Следниот стадиум на појавата е таканаречена хиеноманија, при што медиумот физички и психички прима облик на животно. Иако навистина е тешко да се поверува дека воопшто е можно такво нешто, постојат сведоштва на бројни научници, меѓу кои и сведоштвата на Тишлер (Tischler) и Естерајх (Estereich), кои ја посматрале оваа појава.

Врв на овие појави сигурно претставува приказанието на Исуса Христа. М. Шмит (Schmidt) во својата книга за спиритизмот опишува една ваква материјализација: „Во петокот изутрина имавме приватна сеанса на која беа присутни само осум лица, меѓу кои и д-р Пенц. Медиумот влезе во салата и за дваесетина минути падна во транс. По кратко време, додека духот зборуваше, вратата се отвори и се покажа една величествена појава која нè исполни со страхопочит. Во сета големина на својата слава се појави Исус од Назарет, Господарот над господарите, Царот над царевите, чистиот и свет Господов Помазаник. Дојде да го исполни своето ветување, и стоеше видливо пред нашите очи. Нè посматраше неколку мига, а потоа проговори: ‘Вие сте верни борци и ќе видите и поголеми чуда од ова!’ На госпоѓата Луис (Lewis), која седеше

најблизу до вратата, ѝ подаде рака. Таа ја прифати и му даде цветен венец. Тогаш ѝ подаде рака на госпоѓата Катер (Cutter), која седеше до неа, а потоа на госпоѓата Клајн  (Kline),, која стапи на подиумот. Таму ѝ ја стави раката на глава, ја благослови и ја бакна. Потоа се сврте кон секого од нас, нè благослови, нè бакна, и се повлече. Беше облечен во бела облека, а на главата имаше круна на која се прелеваше голем скапоцен камен… Тоа беше вистинско ремек-дело на материјализацијата.“4

Да, почитувани, во последните денови сатаната сè почесто ќе се јавува како Христос не само на сеанси во полутемни простории и на пусти места (Матеј 24,26), туку пред големи маси луѓе во разни делови на светот како величествена појава, со Христова лика и манири, со привлечен милозвучен глас што плени, како миротворец и добротвор на човештвото, нудејќи му излез од тоталниот безизлез во кој се наоѓа. Ќе ги изнесува истите евангелски пораки што ги изнесувал Христос во свое време, но помешани со лага. Во улога на Христа ќе тврди дека сите промени во библиската наука што ги извршила црквата во текот на вековите, ги извршила со негово одобрение, дека саботата лично тој ја заменил со недела и дека оние, кои и понатаму празнуваат сабота наместо недела, му нанесуваат безмерна болка и нему, но и проклетство на целото човештво, припишувајќи им ја вината ним за хаотичната состојба во која се наоѓа светот и прогласувајќи ги за непријатели на редот и законот, за еретици и за чума на човештвото што треба да се истреби.

Во продолжение следат поднасловите од поглавјето „Библијата за матните води на спиритизмот“. Кога ќе кликнете врз поднасловите, ќе ви се отворат нивните текстови.