Политиката во канџите на спиритизмот

Веќе кажавме дека спиритизмот станува доминантна религиозна сила со доминантна улога во светот, која се инфилтрира во сите сфери од општествениот живот и ги опфаќа сите човечки структури. Она што пред релативно кусо време беше незамисливо, денес е сосем нормално. Маса луѓе, кои му припаѓаат на „рационалниот свет“ – научници, банкари, правници, политичари и деловни луѓе – посетуваат и учествуваат на сеанси во мрачни простории и гледаат во кристални кугли.

Глумицата Ширли МекЛејн е истакната активистка на New Age (Нова доба), модерно име за спиритизмот, верско движење со најголем подем денес во светот. За неа реинкарнацијата е сушта вистина и верува дека светот се наоѓа на праг на духовна преродба. Таа вели: „Гледав главни банкари, деловни луѓе, лекари и други високи службеници како посетуваат духови и од нив бараат совет. Присуствував на овие сеанси за канализирање кога тие ги прашуваа духовите за проблеми од областа на стопанството и стопанските движења во светот, за берзата, за осцилациите на ОПЕК и слично.“13

„Разбирливо е дека на политичарите кога треба да донесат важни, одговорни и тешки одлуки, им се потребни совет и помош. Не е мал бројот меѓу нив кои во такви мигови се свртуваат кон окултизмот. Кралицата Викторија во Англија имала постојан спиритистички медиум по име Џон Браун како советник, а покрај него оваа кралица осумпати го примила и прочуениот медиум Роберт Џемс Лис, на кого му биле благодарни и кардиналите Менинг, Њумен и Гибон и надбискупите Темпл и Бенсон.

Германскиот цар Вилхелм ја консултирал спиритистичката советничка како медиум, госпоѓата Шен. Рускиот цар во целост бил под влијание на спиритистот Распуќин и други медиуми. Зар тоа не е никакво чудо што сите овие совети придонеле за избувнувањето на Првата светска војна?

Во периодот меѓу двете светски војни, прочуениот медиум-спиритист, лекарот Сер Артур Конан Дојл, бил меѓу советниците на американскиот претседател Рузвелт, англискиот крал Едвард VII и министерот Лојд Џорџ.

Винстон Черчил како младич посетувал спиритистички сеанси и воспоставил контакт со еден дух. За време на неговиот престој во Африка како воен известувач на Morning Post се загубил во африканските шуми и овој дух на несфатлив начин го спасил. Од тогаш Черчил не донесувал никакви одлуки, а претходно да не го прашал овој ‘домашен дух’. Британскиот печат отворено пишувал за тоа. Исто така било познато дека политичарите Херберт Морисон и Сер Стафорд Крипс, кога донесувале одлуки, добивале упатства од спиритистички медиуми. Ни канадскиот премиер, Мекензи, не криел дека има врски со ‘другиот свет’.

На почетокот од својата политичка кариера Адолф Хитлер во Минхен се нашол во спиритстички круг кој преку духовите проповедал национално издигнување. Тие го предвиделе и орудието за тоа – Адолфа Хитлера. Од тогаш тој постојано бил под влијание на силен дух кого тој често го нарекувал ‘носител на благослови’ и постојано бил поврзан со него. Дури пет минути по дванаесет часот видението исчезнало и Хитлер завршил со самоубиство.

Бидејќи Англија, Франција, Германија, Канада и САД  за своите важни политички одлуки имале советници од ‘онаа страна’, ни Русија не сакала да заостане зад нив. Јосиф Сталин во својот потесен круг вовел спиритистички медиум по име Волф Месинг. Во Москва е основан парапсихолошки институт кој го проучувал ‘окултното водење на војна’.

Така Втората светска војна станала ужасен пекол кој ја открил вистинската природа на оние тајни ‘советници’. Во последната книга на Новиот завет Христос ја преткажал оваа демонска дејност: ‘Тоа се демонски духови кои прават чудеса и одат кај царевите на цел свет за да ги соберат за војна.’“14

Го спомнавме Сталина и неговиот спиритистички медиум, Волф Месинг. Се раскажува дека Сталин  го повикал Волф Месинг во својот кабинет. Порано тој го гледал Месинга на театарска сцена во Гомељ и посакал да ја тестира моќта на телепатијата, планирајќи своите мисли да им ги наметне на другите луѓе. Од Месинга побарал од банката „Гос“ во Москва да украде сто илјади рубли, а при тоа телепатски да го хипнотизира благајникот кој работел на шалтерот. Така и се случило. Едно утро, Месинг дошол на шалтерот во споменатата банка со малечко ливче чиста хартија во раката. Го насочил својот поглед кон благајникот и му заповедал да му издаде сто илјади рубли. Без премислување благајникот ја извршил таа заповед. Месинг ги зел парите и излегол од банката. Надвор го чекале Сталинови луѓе кои го контролирале успехот или неуспехот на тој потфат. Потоа, кога тие влегле во банката, го нашле благајникот како седи во шок, држејќи го во раце малечкото ливче хартија.

Месинг имал уште едно искуство со Сталина. Овојпат Сталин од него побарал без дозвола да влезе во неговата дача во Кунчево. Меѓутоа, за да влезе во неговата канцеларија, било потребно да помине покрај неколку стражи – прва и втора стража и телохранители. Месинг го прифатил овој предизвик. По неколку дена, Сталин работел во својата дача кога, наеднаш, подигајќи ја главата, го видел Месинга како стои во негова непосредна близина. Месинг во дачата влегол откако телепатски ги хипнотизирал сите стражари, постојано повторувајќи ја изјавата: „Јас сум Берија и вие ме познавате! Јас сум шеф на тајната полиција!“

Секако, стражарите добро го познавале шефот на тајната полиција, Берија. И покрај тоа што разликата меѓу нив била голема, стражарите Месинга го пуштале без никакви прашања. Каква е таа моќ која сите тие стражари ги убедила дека Волф Месинг е Берија, шефот на тајната полиција. Моќта на хипнозата не е моќ на човечката природа. Силите од „отадешниот свет“ извршиле пресудно влијание врз Сталиновите стражари.

Што да кажеме за денешните државници, премиери на влади и други високи функционери, кои го држат кормилото на светот во свои раце? Под чие влијание се тие и кои се нивни советници денес – вражари, гатачи, јасновидци и слично? Немоќни да се справат со светската ситуација, која очигледно се лизга од нивните раце, зар не посегнуваат и тие, или дел од нив, по решенија што ги нудат сатанските духови преку своите медиуми? Тогаш не е тешко да се претпостави во каков хорор и мракобесие ќе го турнат демоните светот!

Сатаната преку спиритизмот се обидува да го протера вистинскиот Христос од овој свет и да го замени со лажни христоси, со лажни пророци. Да ја протера Христовата крв како единствено средсто за спасение од нашите гревови. Тотално да ја замагли изворната библиска наука која носи спасение и да ја замени со човечки измислици, со преданија и суеверија, со историцизми и со историски категории.

За да го поткопа неприкосновениот авторитет на Божјата реч, на Библијата, сатаната преку приказанијата на Марија тврди дека наводно Исус за текстот од Откровение 8,13 кажува: „Остатокот од книгата Откровение ги објаснува настаните што ќе дојдат, но вие имате подобар водич во Мајката Марија, зашто таа ви ги објавила своите претказанија и времињата во кои ќе се одиграат тие настани.“15

Фактот што наводниот христос укажува на Марија како подобар водич, отколку што е вдахновената книга Откровение, веднаш кажува дека зад таа изјава стои директно сатаната, а не вистинскиот Христос кој му го дал интегрално Откровението на својот слуга Јован.

Затоа, почитувани, нашата единствена сигурност лежи во Божјата реч. Да не отстапуваме од она „Пишано е!“ и да не влегуваме во погрешниот воз на спиритизмот.

Во продолжение следат поднасловите од поглавјето „Библијата за матните води на спиритизмот“. Кога ќе кликнете врз поднасловите, ќе ви се отворат нивните текстови.