За анимизмот и пантеизмот

Анимизам. Мистично, спиритистичко верување според кое целокупната природа, дрвјата, птиците, животните и сите елементи, како што се дождот, ветерот, а и луѓето, имаат свој дух или душа. Насекаде околу нас се наоѓаат духови. Тие живеат во земјата, во водата, во облаците, на небото… Анимизмот учи дека луѓето се дел на овој мистичен свет исполнет со духови – со добри и зли. Сите елементи во природата имаат сроден дух кој може да општи со човечкиот дух; луѓето можат да општат, и општат со тие духови, со духовите на тополите, на врбите, со духовите на шумите, на мочуриштата, на планините… Тие духови можат да ги поврзуваат едни со други и да управуваат со нивната судбина, ако ги „слушаат“. Вака веруваат Хиндусите, будистите, американските домородци.

Човек анимист комуницира со врбата, со шумата, со планината, со мочуриштето – го слуша гласот на нивниот дух, стапува во разговор со него. Духот му објаснува, го советува, го упатува, му наредува; се јавуваат разни привиденија и ликови со кои разговара, се договара и заедно прават планови за разни заеднички активности и акции; меѓу нив се развива заемно пријателство и доверба; тие му раскажуваат чудни случки од минатото, му прикажуваат неверојатни настани што треба да се одиграат во иднина, му ги исполнуваат желбите, одат пред него, го водат, му помагаат, го предупредуваат, заедно се впуштаат во разни авантури, учествуваат во чудни заеднички потфати…

И навистина околу нас насекаде има духови, но „тоа се демонски (ѓаволски) духови кои прават чуда“ (Окровение 16,14), и кога луѓето контактираат со божемниот дух на планините, на шумите, на мочуриштата, со духот на врбите и тополите, тие всушност контактираат директно со ѓаволот и со неговите демони кои се кријат зад тој нивни замислен дух. Тоа е опасна и мошне ризична игра која најчесто завршува трагично за оној кој разговара со нив.

Пантеизам (грчки: pan – сè, и teizam- „бог“). Религиозно-филозофско учење кое Бога го идентификува со природата и природата ја посматра како манифестација на божеството, учење според кое бог и природата се едно исто, а предметите и појавите во светот се само моменти на божествениот сеживот, според кој бог и природата не стојат во однос како бог и создадено дело. Идеја дека божјата суштина или вселенската енергија проникнува сè, вклучувајќи ја и планетата Земја. Пантеизмот учи дека вселената и сè што е во неа е бог или негова манифестација. Во пантеизмот не постои жив бог како личност којашто одржува и учествува во настаните меѓу луѓето. Според Библијата, нашиот Творец, Бог, и неговите созданија се две наполно различни нешта, целосно изделени. Библискиот Бог не е внатре во своите созданија, туку е надвор од нив, додека пантеистичкиот бог е едно со созданијата, внатре во нив. Нивниот бог е присутен во сè, во секој елемент на вселената – сè во сè – во листот на дрвото, во тревката, во дождовната капка и во човечките суштества. Верување дека луѓето се богови.

Идејата дека бог е присутен во сè и сè во сè (пантеизам), ги укинува сите разлики меѓу луѓето и животните, зашто сè се слева во едно. Пантеизмот има истакната улога во хиндуистичкиот светоглед.

Атеизмот, натурализмот, монизмот, дуализмот, политеизмот, таоизмот, анимизмот и пантеизмот се дијаметрално спротивни од вистинскиот, теистичкиот библиски светоглед. Сите тие светогледи се наполно спротивни од библискиот креационистички светоглед.

За размислување: Независно од тоа дали сте образовано лице или не, дали верувате дека со вашиот живот управува некое „астрално божество“, кое всушност не е ништо друго освен мртво планетарно тело? Ако сте христијанин (христијанка), прифаќате ли да ве води некој пагански бог, кој нема никакво место во христијанската вера? Не е ли чудно што денес многу „христијани“ веруваат во една ваква паганска религија?

Се надеваме дека не сакате карактерот да ви го обликуваат ниту другите луѓе ниту некакви несовршени „богови“ и „планетарни духови“, кои всушност се ѓаволски духови, безочни демони. Не бидете ничии робови, робови на луѓето, уште помалку робови на демоните, во чијашто рака сте обична ветрушка. Замете го својот случај во свои раце и стојте простум пред силните налети и на астрологијата и на сите други спиритистички, окултни сеништа што се реат над нашите глави, жестоко настојувајќи секој ден да го турнат светот во бездна од која нема излез, да ве стават и вас во својот јарем на најцрно ропство од кое не можете да се избавите ако Бог не ви се смилува да ве избави на ваш повик за помош.

Оставете го настрана Нострадамуса, Саи Баба и сите други квази пророци, сите ѕвездочатци (астролози) кои гатаат и ја преткажуваат вашата иднина и судбина според ѕвездите; настрана гледачите на карти и сите видови вражари и маѓесници; подалеку од сите што се договараат со мртвите и ви пренесуваат од нив пораки од другиот свет; презрете ги јасновидците, оние кои иднината ја преткажуваат вака: „Јас верувам“, „јас очекувам“, „јас се надевам“, „јас претпоставувам“, „јас мислам“…

Почитувани, Бог ќе ни ја открие иднината и нашата вистинска судбина во својата Реч, Библијата, зависно од тоа дали живееме според неа или не.

Во продолжение следат поднасловите од поглавјето „Астрологијата и нејзините апсурди“. Кога ќе кликнете врз поднасловите, ќе ви се отворат нивните текстови.