Односот на христијанинот кон астрологијата

Видовме дека астрологијата не е наука, туку религија со древно паганско потекло, која со силен замав со застрашувачки размери го освојува светот, при што сме соочени со најголемо будење на паганизмот до сега во историјата. Дали христијанството е немоќно па полека се повлекува пред неговата незапирлива навала и инвазија? Да! Дали е во прашање компромис меѓу тие две религии? Да! Дали тие можеби имаат заедничко потекло? Да! – Одговорот на сите три прашања е точен, трипати, категорично – Да! Зошто? Затоа што, од мистериите што ги проучивме, видовме дека денешното христијанство, такво какво што е, и религиите на древниот паганизам, се две сестри близначки со заеднички корени надвор од Библијата и далеку од Бога!

Дефинитивно, астрологијата нема врска со Бога и, независно од тоа колку нејзините застапници се искрени и уверени во својата теорија, тие учат лага, зашто зад нивната „наука“, зад астрологијата, зад ѕвездите, зад Зодијак, зад планетарните богови, стои ѓаволот, кој е „татко на лагата“ и кој со таа лага, заедно со своите демони, опива милиони луѓе низ цел свет.

Бог јасно и целосно ги разоткрива лагите и намерите на сатаната и демоните на сите подрачја, па и на подрачјето на астрологијата. Во Библијата има многу текстови во кои Бог зборува за астрологијата и за нејзините претставници. Овде би изнеле неколку од нив. Кога се зборува за Вавилон и за неговите „ѕвездочатци“ или астролози, кажано е:

„Те изморија твоите многубројни советници. Нека станат само да те спасат оние кои ги премеруваат небесата, кои ги набљудуваат ѕвездите и кои секој месец проречуваат што ќе те снајде. Ете, тие ќе бидат како плева, оган ќе ги изгори. Ни самите себе не ќе се избават од силата на пламенот. Не ќе остане ни жарче за да се огрее некој, ни огниште, да поседи покрај него“ (Исаија 47,13.14). – Страшна судбина за астролозите, зар не? „Тие ќе бидат како плева, оган ќе ги изгори!“

Понатаму: „Да не се расипете па да не си направите за себе некаков делкан лик, кип со машко или женско обличје… и да не се заведеш, кога ќе ги подигнеш своите очи кон небото, па ги видиш сонцето, месечината и ѕвездите – сета небесна војска – па да им се клањаш и да им искажуваш почитување. Твојот Господ – Бог, им ги даде ним на сите народи, секаде под небото“ (5. Мојсеева 4,16.19). Бог бил против обожавањето на древните пагански планетарни богови. Не само што таа религија била забранета, туку сите приврзаници на тие култови, заедно со вражалците и гаталците, се строго осудени:

„Ако некој им се обрати на повикувачи на духови и на вражалци, за да оди блудно по нив, јас ќе се свртам против таквиот човек и ќе го истребам од неговиот народ … маж или жена, кои меѓу вас ќе станат повикувачи на духови на мртви или ќе вражаат, нека бидат казнети со смрт; нека бидат каменувани, а нивната крв нека падне на нив“ (3. Мојс. 20,6.27).

„Кај тебе нека не се најде кој би се бавел со гатање, чародејство, вражање и волшебништво…, заради таквите одвратности тие народи ги гони пред тебе Господ, твојот Бог“ (5. Мојсеева 18,10-12).

Ова се директни изјави на семоќниот библиски Бог. Гатањето и астрологијата ги нарекува „гад“. И да не заборавиме: секој „гад“ се казнувал со смрт. Пред сè затоа што овие категории навистина имаат страшни негативни последици. Од друга страна, затоа што гатањето, а првенствено астрологијата, е посветена на богот на Сонцето, на Луцифера, на најлошиот непријател на човештвото.

Еве ја и најтешката последица со вечни последици за гатачите, за астролозите и…:

„А на страшливците и на неверните, и на гнасните и на убијците, и на блудниците и на гатачите, на идолопоклониците и на сите лажливци, делот им е во езерото што гори со оган и сулфур; тоа е втората смрт“ (Откровение 21,8).

Во продолжение следат поднасловите од поглавјето „Астрологијата и нејзините апсурди“. Кога ќе кликнете врз поднасловите, ќе ви се отворат нивните текстови.