Кој ги измисли апсурдите во врска со космичката енергија и зошто?

Наводно може да се комуницира со другите без употреба на телефон, писмо, интернет; може да се контактира со билките (селанецот со своите посеви) со животните, со мртвата природа (со водата), со мртвите луѓе, или со повисоките, трансцендентни суштества, кои божем можат да гледаат во минатото, во сегашноста, и да ни ја преткажат и иднината итн.

Се наметнува логично прашање: која е или што е таа „умна“, „интелигентна“ „космичка енергија“, кои се тие интелигентни сили со кои човекот контактира? Едноставно, дали тие сили воопшто постојат? Ако не постојат, тогаш кој ги измисли, кој ги постави во вселената, кој ги убеди луѓето дека постојат, зошто воопшто ги измисли и кој стои зад нив? А, ако постојат, тогаш кои се навистина тие сили?

Веднаш да кажеме дека не постои никаква, апсолутно никаква „универзална космичка енергија“, уште помалку некаква „умна“ или „интелигентна космичка енергија“ со која е проникната целата вселена, сите создадени суштества и созданија, никакво „божество“ ниту „божествен принцип“ или „божествена суштина“, „повисоко јас“ или „повисока свест“, никаков „бог во сè“ ниту „сè е бог“, ниту пак сите ние сме богови. Ништо од сето тоа онака како што ни го прикажуваат таоистичко – хиндуистичко – будистичката монистичка, пантеистичка и анимистичка религија и филозофија, со која денес е преплавен светот.

Измислиците за некаква „универзална космичка енергија“, и за сè што е кажано во врска со неа, е извонредно успешен вселенски параван што го подигнал сатаната (ѓаволот) и зад кој мошне успешно се крие себеси и своите подмолни активности за да ги заведе и да ги упропасти луѓето.

Во свое време сатаната (тогашен Луцифер) се обидел да подигне свој престол на небото, во вселената, да се изедначи со Бога, да биде бог (Исаија 12,12-14).

Откако не му успеало да подигне вистински престол во вселената, како пандан на Божјиот вселенски престол, да се изедначи со вистинскиот Бог-Творец и да стане небесн бог, и откако е исфрлен од небото на нашата земја, ѓаволот, сепак, успеал да подигне свој замислен престол и да стане замислен бог во умовите на милијарди луѓе, да лансира идеја за некаква умна и интелигентна „универзална космичка енергија“, со космички димензии, со која наводно може да се контактира. Камуфлажата е извонредно успешна. Милијарди неупатени луѓе, контактирајќи со таа божемна космичка енергија во природата, всушност контактираат директно со сатаната и со неговите бандитски, ѓаволски духови, со неговите демони кои се кријат зад таа замислена енергија што ја внеле во умовите на луѓето. Велиме, камуфлирани и скриени, како и некогаш во рајот кога сатаната бил скриен зад змијата којашто ја прелагала Ева, кога нејзе ѝ се чинело дека зборува со змија, а всушност од зад змијата ѝ зборувал сатаната, ѓаволот.

Почитувани, да внимаваме да не се сопнеме и да не паднеме во стапиците на овие ѓаволски измислици, на оваа окултна, мистична, спиритистичка, сатанска наука, та да се најдеме на негова почва, во неговата мрежа и во неговите страшни канџи од кои тешко ќе можеме да се извлечеме неоштетени. Да не им дозволиме на демонските сили да нè заведат, да ни го затемнат умот, да ни го оперираат мозокот со дрвено рало и да загосподарат со нас; да не ја загубиме својата слобода како најголемо богатство што сме го добиле од Бога, сами слободно да бираме и да ја креираме својата иднина и судбина како слободни суштества, и да не станеме обезличени робови затворени во стегите на сатанското гето во рамките на неговата измислица за некаква умна универзална космичка енергија којашто ни ја одредува нашата судбина против нашата волја.

Во продолжение следат поднасловите од поглавјето „Астрологијата и нејзините апсурди“. Кога ќе кликнете врз поднасловите, ќе ви се отворат нивните текстови.